बागलुङमा जिप दुर्घटना : २ जनाको मृत्यु, १२ घाइते — ६० मिटर तल खस्यो जिप ।

बागलुङको ढोरपाटन नगरपालिका–५ अस्तुमा आज साँझ भएको जिप दुर्घटनामा दुई जनाको ज्यान गएको छ भने १२ जना घाइते भएका छन्। बुर्तिबाङ बजारबाट चौरतर्फ जाँदै गरेको लु प्र ०१-००१ च १७७५ नम्बरको जिप साँझ करिब ५:४५ बजे सडकबाट ६० मिटर तल खस्दा दुर्घटना भएको हो।

जिल्ला प्रहरी कार्यालय बागलुङका प्रहरी निरीक्षक केशव थापाका अनुसार घाइते र मृतकको सनाखत खुल्न बाँकी छ। ‘अहिले प्रहरी, स्थानीयवासी र जनप्रतिनिधिको सक्रियतामा उद्धार कार्य भइरहेको छ,’ उनले बताए।ढोरपाटन नगरपालिकाका उपप्रमुख धनबहादुर कायतले ६ जना घाइतेलाई उपचारका लागि बुर्तिबाङ प्रादेशिक अस्पताल पठाइएको जानकारी दिए।

उनका अनुसार दुई शवको सङ्कलन कार्य भइरहेको छ।‘हामी घटनास्थलमै छौँ, उद्धार जारी छ,’ उपप्रमुख कायतले भने, ‘दुर्घटनामा दुई जनाको मृत्यु भएको छ, अन्यको उद्धार गरी उपचारमा पठाइएको छ।’