पत्रकार महासंघ भक्तपुरको आयोजनामा धान दिवस ,दही चिउरा खाँदै रोपाइँको थकान मेटाउँदै।

असार १५
भक्तपुर –नेपाल पत्रकार महासंघ भक्तपुर शाखाको आयोजनामा असार १५ को अवसरमा राष्ट्रिय धान दिवस कार्यक्रम सम्पन्न भएको छ। कार्यक्रमको उद्देश्य पत्रकारबीच आपसी भेटघाट, भातृत्व सञ्जाल विस्तार तथा रोपाई पछी देखिने शारीरिक र मानसिक थकान मेटाउने रहेको पत्रकार महासंघ भक्तपुर शाखाका अध्यक्ष सुन्दर शिल्पकारले जानकारी दिएका हुन् ।

दही चिउरा खुवाउँदै गरिएको कार्यक्रममा सहभागीहरूले धान दिवसको महत्व प्रति ऐक्यबद्धता जनाउँदै आगामी दिनमा महासंघले यस्ता कार्यक्रमहरु आयोजना गर्ने बताएका हुन् । असार १५ लाई नेपालमा ‘दही चिउरा खाने दिन’का रूपमा मात्र नभई राष्ट्रिय धान दिवसका रूपमा समेत मनाउने गरिन्छ।कृषिप्रधान देश नेपालमा जनसंख्याको ठूलो हिस्सा कृषि पेशामा संलग्न भएकाले (वि.सं. २०६१) देखि असार १५ लाई औपचारिक रूपमा राष्ट्रिय धान दिवसको रूपमा मनाउन थालिएको हो ।

शारीरिक परिश्रमपश्चात दही चिउरा खाँदा शरीरमा शीतलता आउँछ र ऊर्जा सञ्चय हुने विश्वासका साथ यो परम्परा निरन्तर चल्दै आएको छ। यस दिन देशका विभिन्न स्थानमा धान रोपाइँ, कृषि प्रदर्शनी, सांस्कृतिक कार्यक्रम र भेटघाटको आयोजना गरिँदै आएको छ।नेपाल पत्रकार महासंघ भक्तपुर शाखा अध्यक्ष सुन्दर शिल्पकारको अध्यक्षतामा सम्पन्न कार्यक्रममा जिल्लाका क्रियाशील पत्रकारहरूको उल्लेखनीय उपस्थिति रहेको थियो।