१८ जनाको ज्यान गएको सौर्य एअरलाइन्सको दुर्घटनाको प्रतिवेदन सार्वजनिक।

गत साउन ९ गते मर्मतका लागि त्रिभुवन अन्तर्राष्ट्रिय विमानस्थलबाट पोखरा उडेको सौर्य एअरलाइन्सको ‘नाइन–एन–एएमई–सीआरजे २००’ जहाज टेकअफको केही समयमै धावनमार्ग नजिकै दुर्घटनाग्रस्त हुँदा १८ जनाको ज्यान गएको थियो।दुर्घटनामा रहेका एक्ला जीवित पाइलट मनीष शाक्य भने आश्चर्यजनक रूपमा बाँच्न सफल भएका थिए।

यस हृदयविदारक दुर्घटनाको अध्ययन गर्न सरकारले नेपाल नागरिक उड्डयन प्राधिकरणका पूर्व महानिर्देशक रतिशचन्द्रलाल सुमनको नेतृत्वमा जाँचबुझ आयोग गठन गरेको थियो।आज संस्कृति, पर्यटन तथा नागरिक उड्डयन मन्त्रालयमा आयोजित कार्यक्रममा आयोगका अध्यक्ष सुमनले संस्कृति, पर्यटन तथा नागरिक उड्डयनमन्त्री बद्रीप्रसाद पाण्डेलाई अन्तिम प्रतिवेदन हस्तान्तरण गर्नुभयो।

मन्त्री पाण्डेले आयोगले कुनै मुलाहिजा नराखी निष्पक्ष प्रतिवेदन तयार पारेको भन्दै त्यसलाई पूर्णरूपमा कार्यान्वयनमा लैजाने प्रतिबद्धता व्यक्त गर्नुभयो।
मन्त्रालयले प्रतिवेदन प्राप्त गरेलगत्तै आफ्नो आधिकारिक वेबसाइटमार्फत प्रतिवेदन सार्वजनिक गरेको छ।