हप्ताको अन्तिम दिन आज सेयर बजार दोहोरो अङ्कले घट्यो

भक्तपुर  :  आज कारोबार हुने हप्ताको अन्तिम दिन सेयर बजार दोहोरो अङ्कले घटेको छ । सेयर  बजार परिसूचक नेप्से आज १९ दशमलव ९७ अङ्कले घटेर २ हजार ३ सय ५६ दशमलव २० बिन्दुमा झरेको छ ।

सबै समूहको सेयर आज ओरालो लागेको छ । नेप्से घटे पनि कारोबार रकममा भने सामान्य सुधार आएको छ ।

२ सय २६ वटा कम्पनीका ४५ लाख ७४ हजार कित्ता सेयर १ अर्ब ४९ करोड ६२ लाख रुपैयाँमा कारोबार भएका छन् ।

आज सबैभन्दा धेरै गुहेश्री मर्चेन्ट एन्ड फाइनान्स कम्पनीको सेयर झन्डै ४ प्रतिशतले घटेको छ भने आईएमई जनरल इन्स्योरेन्स कम्पनीको ५ करोड २५ लाख रुपैयाँको सेयर किनबेच भएको छ ।

समग्रमा बजार घटे पनि जाल्पा लघुवित्त कम्पनीको सेयर भने १० प्रतिशतले बढेको छ ।