ब्रह्मनगर टोल सुधार समितिद्वारा महाशिवरात्रि विशेष पूजापाठ सम्पन्न

बालकोट-३, भक्तपुर – हिन्दू धर्मावलम्बीहरूको महान पर्व महा शिवरात्रि यस वर्ष पनि भक्तिमय वातावरणमा ब्रह्मनगर टोल सुधार समितिको आयोजनामा विशेष पूजापाठका साथ सम्पन्न गरिएको छ। समितिकी अध्यक्ष मीना कार्की, उपाध्यक्ष मोहन रेग्मी, सचिव नवराज भट्टराई, कोषाध्यक्ष लक्ष्मी भट्टराई, सदस्यहरू रियान खड्का, सानो भाई बस्नेत लगायतका पदाधिकारीहरूको उपस्थितिमा शिवपूजा, आरती तथा धार्मिक अनुष्ठान सम्पन्न गरिएको थियो।

मन्दिर उपसमितिकी संयोजक श्री चन्दना शेन गुप्ता तथा श्रीमती मैया देवी ढुंगेलको संयोजनमा विशेष शिव पूजा, अभिषेक एवं शिवशुन्य कार्यक्रम आयोजना गरिएको थियो। कार्यक्रममा श्रद्धालु भक्तजनहरूले शिवलिंगमा जल, दूध, दही, घिउ, मह, बेलपत्र, धतूरो तथा गंगाजल अर्पण गर्दै भगवान शिवको कृपा प्राप्त गर्न विशेष पूजा गरेका थिए। भजन-कीर्तन, आरती एवं धार्मिक प्रवचनहरूले मन्दिर परिसरलाई पूर्ण रूपमा भक्तिमय बनाएको थियो।

यस विशेष पूजामा आचार्य रत्न देव आचार्य, रामप्रसाद सुवेदी र श्याम आचार्यले वैदिक विधिअनुसार शिव पूजाको नेतृत्व गर्दै मन्त्र उच्चारण, हवन तथा धार्मिक अनुष्ठान सम्पन्न गराएका थिए। पूजाको क्रममा शिवमहिमा प्रवचन समेत गरिएको थियो, जसमा उपस्थित भक्तजनहरूले धार्मिक ज्ञान प्राप्त गर्दै आध्यात्मिक आनन्द अनुभव गरेका थिए।

धार्मिक वातावरणलाई थप उत्साहजनक बनाउन विशेष शिव भजन संगीतमय टोलीको प्रस्तुति समेत राखिएको थियो, जसले भक्तजनहरूलाई आध्यात्मिक शान्ति प्रदान गरेको थियो। पूजापाठपछि उपस्थित भक्तजनहरूलाई महाप्रसाद वितरण गरिएको थियो।

समारोहलाई व्यवस्थित बनाउन स्वयंसेवकहरू परिचालित गरिएको थियो भने मन्दिर परिसरको विशेष सरसफाइ अभियान समेत सञ्चालन गरिएको थियो। सुरक्षाको दृष्टिकोणले समितिले स्थानीय प्रशासनसँग समन्वय गरी उचित व्यवस्थापन गरेको थियो।

मन्दिर उपसमितिकी संयोजक श्री चन्दना शेन गुप्ताले भक्तजनहरूको सहभागिताले कार्यक्रमलाई भव्य र सफल बनाएको भन्दै धन्यवाद ज्ञापन गर्नुभयो। त्यस्तै, समितिकी अध्यक्ष मीना कार्कीले शिवरात्रिको धार्मिक तथा सांस्कृतिक महत्त्वबारे प्रकाश पार्दै, आगामी वर्षहरूमा झन् व्यवस्थित रूपमा कार्यक्रम आयोजना गर्ने प्रतिबद्धता व्यक्त गर्नुभयो।

हर हर महादेव!