‘कांग्रेस हाम्रो विगत मात्र होइन, चेतना र संस्कार हो:नैनसिंह महर

तिर्थ नेपाली-
भक्तपुर -नेपाली कांग्रेसका पूर्व सभापति शेरबहादुर देउवाले निर्वाचन नलड्ने घोषणा गरेपछि डडेलधुरास्थित उनको निर्वाचन क्षेत्रबाट कांग्रेस नेता नैनसिंह महर प्रतिनिधि सभा सदस्य निर्वाचनमा होमिएका छन्।

आगामी फागुन २१ गते हुन गइरहेको प्रतिनिधि सभा सदस्य निर्वाचनका लागि कांग्रेस सभापति गगन थापाले डडेलधुराबाट नैनसिंह महरलाई उम्मेदवारको टिकट दिएका हुन्। महर नेपाली कांग्रेसका निवर्तमान केन्द्रीय सदस्यसमेत हुन्।महरले शुक्रबार सामाजिक सञ्जालमार्फत आफ्नो धारणा सार्वजनिक गरेका छन्। उनले लेखेका छन्,

“कांग्रेस हाम्रो विगत मात्र होइन, हाम्रो चेतना र संस्कार हो।समय बदलियो, अनुहार बदलिए,तर विश्वास कहिल्यै बदलिएन।
त्यही भरोसाको निरन्तरता— डडेलधुराबाट नैन सिंह महर।”

देउवाले निर्वाचन नलड्ने निर्णय गरेपछि कांग्रेसभित्र नयाँ नेतृत्व अघि सार्ने तयारीस्वरूप महरलाई उम्मेदवार बनाइएको पार्टी स्रोतले जनाएको छ। डडेलधुरामा कांग्रेसको परम्परागत प्रभाव रहेकाले यो निर्वाचनलाई चासोका साथ हेरिएको छ।